Etz, moan i, gehts langsam o mitm Wahlkampf. De CSU ist plötzlich "Näher dran" und de Freien Wähler hom neierdings Lichtblicke. Guat, des is wahrscheinlich eh ois g'long, dass dir schwindlig werd, oba des is doch a wieda des Schene am Wahlkampf. Des woaß ma doch eh, dass do halt jeder bloß des erzählt, wos er glaubt, dass de Leit hern wolln, damits de Kreizln an der richtigen Stell macha. Und mia Bürger wissn des ja längst, oba lassn de halt in dem Glaubn, dass mir eana des ois glaubm und dann de Wahlentscheidung anhand von dem Wahlprogramm und de Argumenta treffa. Oba, do muaß i ehrlich amal song, do san fei de Herrn Feierabend-Politiker a ganz sche naiv. Glaum denn de wirklich, i wähl oan vo dene zwecks dem Parteiprogramm. Na, wirkli net. An Schmuttermayr, den wähl i scho aloa desweng, dass er zum achten Mal neikummt. Und den Käser, den wähl i a – weil der braucht unbedingt weiterhin jeden bei der SPD möglichen Posten in der Region. Und a so konnst du für jeden wos finden, wennst du mogst. Sogar fürn Stadler und den Dings. Woaßt scho, der wo nie wos sogt. Obwohl, is vielleicht besser so.