I glaub, i spinn! Do stellt as Gricht dem Pfahofara Landratsamt den Bau ei, weil a Nachbar an Schattn hot. Also, i moan etz an richtigen Schatten, woaßt scho. Koa Sonn halt! Do frogst de natürlich scho, wia sowas passiern konn. Etz sitzn do in dem Landratsamt a paarhundert so genannte Verwaltungsexpertn drin und nachat san de net amal in der Lage, dass de für sich selba an Plan vorleng, der wo sauber is. Song ma mal so: Scho, dass des Gricht per Eilentscheid den Bau eistellt, zoagt doch, dass do wos net sauber is. Na, also wirklich: I woaß goa net, wos i do no song soll. Wenn a Landratsamt, des wo normalerweis de Bauplän vo uns normale Bürger genehmigt oder oblehnt, net amal selba an vernünftigen Plan hibringt, nachat mecht i wahrscheinlich net wissn, wos de bei uns do oft für an Schmarrn entscheidn und wia de do aufg'schaftln. Des is ja, als wia wenn i de andern immer super-g'scheit erklärn tat, wia des mit de Weiber lafft, und nachat selber koan hochkriag.