Kaum kimmt da Frühling, zündns doch no auf, de Parteien in der heißn Phase vom Wahlkampf. Naja, wos hoaßt aufzündn. De Haderthauer von der CSU kummt halt nach Scheyern und da Lindner vo da FDP is morgn zum Kaffeekranzl in Pfahofa eiglon. I tat ja de Haderthauer gern amal frong, ob sie eigentlich als Kind mit Modellautos gspuit hot. Und außerdem mechat i von ihra gern wissn, ob sie in ihrm neien Job in der Staatskanzlei etz no mehra Stress hot, wenn da Seehofer sei eigene Politik jedn Tog nei interprätiert. Und beim Lindner tat mi interessiern, ob er sein Kaffee schwarz trinkt. Mei, und überhaupts, do werd a schaung, da Lindner. Der moant wahrscheinlich, do gibts morng an großn Auftrieb mit Tralala und Holldrijöh, wenn er do is – und nachat hockan da Postel, da Daschner und da Kalu…dings mit der gelben Tonne do. Der werd glei moana, er is etz doch da neie Entwicklungshilfeminister.