Ja mei, der Hammerschmid Werner vo da Wolnzacher SPD, des is a Oider Rotkreizler. Der konn Erschte Hilfe – und etzat huift er sich praktisch erscht amal selber. Praktisch Krisenintervention am eigenen Leib. Zwecks Enttäuschung vo de Freien Wähler, weil de hom sich ja angeblich net ans Ehrenwort g'halten und koaliern etzat mit da CSU und pfeifan auf de bunte Koalition. Freie Quäler, halt! Guat, denkt se da Ober-Sozi Hammerschmid: Nervts ihr mi, nerv i eich. Jednfalls wui er etzat Zwoata Buagamoasta werdn. Do is bloß de Frage, ob des wos werd, weil dann miassat er ja Stimmen vo da CSU oder vo de Freien Wähler kriang. Naja, mia wern ja seng, wos des no werd. Bei de Freien Wähler is ja a Meinung fast genau so schnell g'ändert wia beim Horst Seehofer. Jednfalls wui da Hammerschmid Vize werdn. Und angeblich hot er desweng a scho mit Bayer Leverkusen Kontakt aufg'nomma. Weil de hom über Jahre bewiesn, dass sie ganz genau wissn, wia ma Zwoata werd.