Also, i hob mir etz de Ergebnisse von dera Bürgerbefragung zwecks gelber Sack und gelbe Tonne no amal ganz genau o’gschaut. Des is wirklich da Wahnsinn! In Geisenfeld hom 108 Leit a ungültige Stimm obgem. Ja, wia geht nachat des? Do werst du g’fragt, ob du de gelbe Tonne wuist oder den gelbn Sack – und machst entweder do oder dort de Kreizl hi und gehst wieder hoam. Wos konnst etz do bitte verkehrt macha? I bin ja net so guat im Prozentrechnen, oba wenn in Geisenfeld insgesamt 1988 Leit obgstimmt hom und 108 Zettln warn ungültig, nachat san des doch ungefähr fünf Prozent, de wo's net kapiert hom. Do is mir wirklich Angst und Bang. Vor allem zwecks da Umwelt. Weil wenn de Geisenfelder bei der Mülltrennung genauso guat san wia beim Kreizl macha, nachat leckst mi am Oarsch. Weil nachat kumma bei dene wahrscheins de oidn Zeitungen in Restmüll, de ausgschlecktn Joghurtbecher in Papiertonne und de Kartoffelschaln in gelben Sack nei.