Also, i glaub, i geh a nomal zur Bundeswehr, etz wo de von der Leyen den Verein so attraktiv macht. Du, de kriang etzat alle a Luxus-Loft mit Flachbild-Fernseher und allem Schnickschnack. Und vor allem is des bei der Bundeswehr doch a leichter Job: Einfach as Hirn ausschalten und stur des macha, wos der sogt, der wo an höhern Dienstgrad hot wia du. Auf der andern Seiten: Mit dera Taktik konnst as in da Politik a weit bringa. Und do brauchst dann net amal so an Flecktarn, wennst unauffällig sei mogst – do langt scho: Maul halten und koane schnellen Bewegungen.