I hob mir etz amal de Aufzeichnung vo da letzten Pfahofara Stadtrats-Sitzung im Online-Archiv vo da Stodt o'gschaut. Also, des is wirklich nimmer lustig: Immer, wenn oana vo da CSU aufgruafa werd und du g’spannt bist, wos der etzat sogt, nachat werd da Bildschirm schwarz und du siehgst und herst nix, bis er fertig is mit seiner Wortmeldung. Oba de Schwarzn wollten des ja so, weil si meng ja net ins Archiv nei. Und de bunte Koalition, de g’freit se etz wahrscheinlich und lacht in sich nei. Weil ab sofort kriang da Käser, da Haiplik, da Dörfler, da Heinzlmair und wias alle hoaßn praktisch auf Kosten der Allgemeinheit alle vier Wocha a Werbe-Video für de bunte Koalition produziert. Mit freundlicher Unterstützung der CSU, sozusagen.