Do werns wieda spitzn, de Inglstädter. Hot da Hipp-Hans heit amal schnell auf a Stund mit seine Leit a zwölf Meter lange Schokoladen-Tafel am Hauptplotz hizimmert... Do kinnans etz wieda beraten und workshoppen auf da Schanz, wias des desmal nochmacha. Oba net amal as Obkupfern bringans ja richtig hi. Schauts eich doch des Wasserspui auf dene eanam Paradeplatz o, des is doch höchstens a verunglückte Viechtränk. Und mit dem kostenlosen WLAN in da City warn mia a vui schnella. Und unsere Stadtrat-Sitzungen, de hom mia scho mit Live-Stream im Internet ogschaut, da hom de in Inglstodt no net amal Computer g'habt. Und des Beste is ja: Angeblich hom de sich ja sogar bei dem neuen Rathaus in Inglstodt bei uns Anregungen g'holt. Bloß dummerweis halt von unserem alten Landratsamt – und des is ja so greislig, dass da schwindlig werd.