Etz wolln also de Krankenhäuser vo Pfahofa und Schromhausn schaun, ob sie künftig vielleicht zamarban. I woaß ja net, wos de Schromhausner kinna solln, wos mir net selber vui besser hibringa. Und überhaupt, de solln doch Operieren und net Kooperieren. Oba sowas werd ja bekanntlich eh net so hoaß gessn, wias koch werd. Weil de Großkopfertn in dene Aufsichtsrät, de hom ja etz bloß amal beschlossn, dass sie a Machbarkeitsstudie in Auftrag gem. Des is dann scho mal der erschte Behandlungserfolg – weil an der Studie verdient etz irgend a Firma an Haufa Geld und is finanziell sofort gsund.