Des haltst du echt im Kopf net aus. Tebartz van Elst, Uli Hoeneß, Berlusconi, Ilmtalklinik, Eisstadion, Schul- und Sportzentrum Pfahofa – überall gehts bloß no um Millionen. Sogar bei Schlag den Raab san etz drei Millionen im Pott, weil der Herr Kriminalkommissar gestern ja überhaupt koan Plan g'habt hot. Und i Depp red hier jeden Abend saublöd daher und kriag net amal Mindestlohn. Do bleibt mir doch gar nix anders mehr übrig, als im März fürn Burgamoasta zu kandidiern. Do kriagst fürs Labern wenigsten no a Geld. I woaß etz bloß no net, wo i o'tritt. In Pfahofa san de Chancen eigentlich net schlecht, do host an Herker und an Röder als Gegenkandidaten – der oane is bei der SPD, der andere bei der Polizei. Des san etz net grod Vereine, wo du sogst: Da tobt die Menge. Oder i packs in Scheyern, do hot se ja da Amtsinhaber mit da Rolltreppn ins politische Aus befördert. Oba dann miassat i natürlich mei größtes Hobby aufgebm, des Fotografiern. In Gerolsbach is die Lage a schwierig, do host immer Ärger mit dem Wadlbeißer, dem Maurer Stefan. Do bleibt mir eigentlich nur no Ernsgon, do host dei Rua. Oda natürlich Hettenshausen. Weil do host du des Weblinger Feld, wo etz dann baut werd ohne End. Da sprudeln de Einnahmen vo da Steuer. Dann konnst du dir a endlich de Verwaltungsgemeinschaft mit dene Ilmmünstera spoarn. Dann kinnas amal schaun do drüm, wias den Kredit für eana neis Rothaus abzahln.