Du, des muaß ma se mal vorstelln. War i heit in der Stodt drin, kummt gegenüber vom alten Rentamt a so Preiss her zu mir und redt me einfach vo da Seitn o zwecks städtebauliches Gesamtkonzept und wos woaß i. Nacha fangt der o zum Schwadroniern: "Ja, also, mir leuchtet schon ein, dass da bei der Fassadengestaltung nachjustiert werden muss. Denn dieser Kubus fügt sich ja ästhetisch so gar nicht in dieses historische Ensemble ein und repräsentiert auf geradezu beklemmende Art ein unerwünschtes architektonisches Spannungsverhältnis zwischen Geschichte und Gegenwart." Den moan i homs als Kind net mitspuin lassen… I hob eam dann erscht amal klar g'macht, dass mia unser Landratsamt etz dann scho sauber renoviern und eventuell sogar no a Stockwerk draufbaun, do braucht er si überhaupt net kümmern. Und wia i dem Gscheithaferl grod so de Lage erklär, stellt si doch glatt raus, dass er gor net des Landratsamt moant, sondern des neie Rothaus.