Host du des Buidl vom Röder als Nikolaus g'seng? Steht eam goa net schlecht, der Bart, gell. Do schaut er fast a bissl aus wia so a Mutation aus Holzfäller, Biker und griechischer Philosoph. Dabei is er koa Holzfäller, sondern Polizist. Und koa Biker, sondern Buagamoasta-Kandidat. Und de Wahrscheinlichkeit, dass du als CSUler a Philosoph bist, de is ungefähr so groß, wia dass Österreich bei der Fuaßboi-WM nächsts Jahr ins Finale kummt – de san nämlich goa net qualifiziert. Da Herker, der hot ja sofort in Facebook kommentiert, dass der Röder ja evangelisch is, a Protestant quasi. Oba so genau deaf ma des etz a wieda net nehma. Wei erschnts is doch des dem Knecht Ruprecht wurscht, ob sei Chef evangelisch oder katholisch is, und zwoatns: Wenn im schwarzn Pfahofa a Sozi Buagamosta sei konn, nachat konn da Nikolaus zumindest Religionsfreiheit hom.