Du, da Hammerschmid Werner vo Wolnzach, mit dem is net zum Spaßn. Als Rot-Kreizler, do huift er ja eh, wenn er konn. Oba etz hot er als hiesiger Ober-Sozi dem Überläufer Gernot Trapp a sauba g'holfa und hot'n glei nausg'haut aus Partei und Fraktion und alle Gremien. Politischer exitus, praktisch. Der Trapp traut se oba a wirklich wos. Der hot se, obwohl er ja für de SPD im Gemeinderat drinhockt, doch glatt für bei der FDP/UW vom Schäch aufstelln lassn. Und zerscht hot er angeblich ja imma no g'sagt, er hot eigentlich überhaupts koa Zeit mehr. Oba so san's, de Politker: Wo interessiert mi mei Gschmarre von gestern?! Sowas konnst du natürlich mit'm Hammerschmid net macha. Do weckst du im größten Lebensretter den politischen Killerinstinkt... Und den Woedl von da Ilmtalklinik, den homs ja etzat a no nausgschmissn, fristlos. Im Nachhinhein praktisch, weil der ja eh scho weg war. Naja, da Schäch und da Trapp, de san etz eh scho beinand, da konn se da Woedl glei no dazudoa, und da Müller vo Scheyern, der kanntat a no mitmacha. Des werat a lustige Partei.