Leck mi am Oarsch, heit Nacht bin i wieda total durchg'wschitzt aufg'wacht. Blutdruck 200, koider Schweiß und fix und fertig. Solche Alpträume hob i in letzter Zeit öfters. Und immer homs irgendwia mit da hiesigen Politik zum doa. Desmal hot's klingelt, i mach auf und siehg drei Typen mit Krona auf. Zerscht hob i denkt, des san de Heilign Drei Kini, oba dann plötzlich merk i: Des san ja drei Schwarze! Da Röder, da Schmuttermayr und da Prechter. Und de schreim mir an mei Haustür hi: "20 C + S + U 14". Und wia i sog, dass i des net wui, kummt no a Vierter, nimmt mi in am Kieslaster mit, i kumm vor a Tribunal und werd weger kultureller Mutation verurteilt zu zehn Jahr Lichter- und Laternenfestverbot. Und da Habl und da Müller fotografiern und fuima ois. Du, des san Alpträume.