Etz geht's oba auf oamal hoaß her in dera koidn Zeitn. Do hot da SPD-Fernseh-Star Käser da CSU ja a sauberne hibrettert. De dan se aufführn wia in da Muppet-Show, sogt er. Hui, do konnst song: Etz geht er endlich los, da Wahlkampf. Oder da Fasching. Naja, wos hoaßt Wahlkampf: De neie GfG hot ja scho a Empfehlung fürn Herker ausgem und de Grüna hom eam etz sogoa zum Buagamoasta-Kandidatn g'wählt. Ja, leck mi doch! G'hern de etz alle zamm, oder wos? De Grüna stelln an Rotn auf. Des hätts früher net gem. Des werd mir fast a bissl zu bunt. Sozialdemokratische Mutation, oder wos? I bin ja g'spannt, wos da Röder zu dem ganzen Thema sogt. I hoff ja, dass ma von dem etz mal wieda wos hert. Oder homs den aus Versehen in der Inspektion eigsperrt, wias alle in Weihnachts-Urlaub ganga san? Und de Schnapp haut glei no dem Gürtner oane drüber, dass de Freia Wähler eam bloß wega da Eitelkeit aufg'stellt hom. Etz woaß i bloß net: Wega seiner eigenen etz oder wega dera von der FW? Wahrscheins beides. Is ja eigentlich eh wurscht. I wähl sowieso de FDP, des hob i mir etz endgültig überlegt über Weihnachten. Weil ma soll, wenns oam selba guat geht, a immer an de denga, de Not leidn. Und de FDP is politisch g'seng mindestens dritte Welt.