Also, wennst in Pfahofara Stadtrat neigehst, also als Zuschauer, du, do lernst du die Regeln der höheren Mathematik. Do kost des Saniern von einer so genannten Winkelstützwand 1,1 Millionen und des halt dann für 30 Johr. Und a Neubau, der kost 1,3 Millionen und halt oba satte 70 Johr – is oba de schlechtere Lösung. Naja, versteh muaß ma des ja net, hauptsach mir zohln. Bin i froh, dass da Schmuttermayr do drinsitzt und dene Planer zumindest imma g'scheit auf d'Finger klopft, sunst gangat do ois drunter und drüber. Hoffentlich wählns an Schmutti wieda nei. Weil erscht heit hot er wieda aufpasst, dass bei der Sanierung vom Eisstadion – du, de kost fei a 4,6 Millionen –, also dass bei dera Sanierung fei dann a des Reng- und Schmelzwasser g'scheit von dem neia Doch oblaft. Do hot er scho recht. Weil es san ja angeblich scho Schulen baut worn, noglnei und total modern und für an Haufa Geld, und nachat warns net ganz dicht. Und es hot zum Beispui a scho Fälle gem, do san am Schluss Tausende von Pflasterstoana übrig bliem, weil irgendoana falsch grechnet hot. Des is wia beim Spinat. Jahrzehnte lang san de Kinda vollgstopft worn mit dem greana Batz, dass eana vorn und hinten wieder rausg'laffa is, bloß weil irgend so a Spezialist des Komma an der falschn Stell g'macht hot und desweng alle g'moant hom, Spinat is g'sund und hot an Haufa Eisen. Du, des war uns mitm Schmutti net passiert. Der kennt se mit Eisen aus. Und der hätt scho g'sagt: Hörts ma bloß auf mit eierm scheiß Spinat. Leberkas mit Ei, do kriagst a Kraft. I friß doch meim Mittog-Essen net as Fressen weg.