Ja, des hob i scho g'wusst, dass de deitschn Wintersportler bei Audi im Windkanal für de Olympiade trainiert hom. Des hot mir ja a Spezl erzählt, der wo bei Audi arbat. Der is nämlich für de Koordination zuständig und do hot's ja terminliche Probleme gem, weil nämlich da Röder und der Gürtner a scho den Windkanal bucht g'habt hom zwecks Wahlkampfvorbereitung – weil do blost dir a da Wind entgeng und da wolltns halt a bisserl üben, dass sie nachat net so bläd schaung, wenns richtig losgeht. Oba des Dumme war, de Zwoa hom praktisch kaum mehr an g'scheidn Termin kriagt, weil da Straub und da Seehofer a dauernd drin warn in dem Windkanal wega irgendwelche Selbstversuche mit Abstandsflächen.