Also, Leitln, i bin dann mal wieder weg beim Schifoahrn für a langs Wochenend. Hoffentlich kriag i am Pfahofara Bahnhof überhaupts no an Parkplotz. Oba do tuat se etz dann nach der Wahl ja sofort wos. Wahrscheinlich wern scho am 17. März de Bagger orolln und an neien Pendler-Parkplotz baun. Weil einig san se ja wieder mal alle – wia halt de letzten sechs Johr a. Da Röder sogt: Mehr Parkplätze am Bahnhof miaßn her – weil nicht nur näher dran am Menschen, sondern auch näher am Bahngleis. Da Herker sogt: Ja, genau, des mach ma eh, do samma scho dro an dem Thema! Und wenn der neie Parkplotz etz a no vom Gürtner und vom Haiplik eig'weiht und nach der Schratt benannt werd, nachat war wieda alles nachhaltig bunt und super. Mei oh mei, so geht doch koa Wahlkampf. I versteh des net, dass de des alle einfach net schnalln. Da oane wui a Gutachten zu am Thema, wos eh bloß oa oanzige Meinung gibt. Und vom andern hot ma no überhaupt nix g'hert in Sachen Wahlkampf. Du, no weniger Bewegung wia in dem Wahlkampf herrscht höchstens in so mancher Amtsstubn – oder halt auf der Baustell vom Landratsamt.