Manchmal is de Welt scho verkehrt. Etz miaßn für de Gartenschau in Pfahofa erscht amal 70 Bam am Stadion weg. So vui zum Thema Natur. Naja, zumindest is Holz a recht nachhaltiger Brennstoff. Vielleicht kriang ma do den nächsten Preis dafür. Für nachhaliges Roden oder lebenswertes Abholzen oder so. Oba so is des manchmal halt in unserer neumodernen Welt. Do muaßt du erscht amal 70 oide Bam umhaun, dass du nachat 300 neie pflanzen konnst. Naja, wia im richtigen Lebn halt: Do muaßt du ja a erscht amal dei Oide mit großem Drama und vui Tränen nausschmeißn, dass du dir dann a no vui Schenare holn konnst und alles no besser werd. Oba komisch hört sich des natürlich auf jeden Fall o: Pfaffenhofen rodet 70 Bäume für Natur in der Stadt. Mei Spezl sogt, des klingt ja so verquer, als wenn du zum Fremdgeh dei Frau mitnimmst. Oba i muaß a song, mei Spezl hots mit de Vergleiche etz wirklich net so. Do is der vergleichsweis a Depp.