Mei, heit wars schee, endlich mal wieder a bissl a Sonn und net goar so kolt. So konnst as aushalten in Pfahofa. Du, oba des Wahlkampf-Gekuschel von dene Parteien und Kandidaten, des geht mir wirklich aufn Keks. Da oane trinkt beim andern a Bier und da ander schaut beim oana am Wahlkampf-Stand vorbei und grod nett sans alle zuanand. Des is ja wia damals in der Flower-Power-Hippie-Zeit. Jeder mog jedn, jeder machts mit jedem, alles konn, nix muaß. Ja, glaum de denn, ma kriagt a Mehrheit im Stadtrat, weil ma nett is? Hot denn bitte de CSU dreihundert Jahr in Bayern de absolute Mehrheit g'habt, weils de Nettesten warn? Oder is da Felix Magath a so a erfolgreicher Trainer, weil er so a Netter is? Geh, bitte, mir san doch net bei Alice im Wunderland oder aufm Ponyhof. Selbst bei de Olympischen Spiele interessiert "Dabei sein ist alles" scho seit 2000 Jahr koan mehr. Gwinna muaßt und zwar egal wia. Oba es konn natürlich a sei, dass do einige a ganz subtile Taktik hom: Dass de sozusagen ihre Mitbewerber so fest in Arm nehma, dass de koa Luft mehr kriang. Des konn natürlich scho sei. Luft und heiße Luft san ja a im Wahlkampf wichtige Aspekte. Da Herker hot jedenfalls scho mal mitm Raucha aufg'hert.