Also ehrlich, mir lafts eiskoit an Buckl nunter, wenn i mir durchrechnet, wos do etz alles für Koalitionen im neien Stadtrat vo Pfahofa möglich san. Ja, pfiat di God! Des kanntat wieder ganz schee bunt wern, selbst ohne Habl. Und mittendrin derf etz da Gürtner mit seine Freien Wähler a no as Züngerl an der Waage spuin. Do kummt der ja ausm Grinsen gar nimma raus. Naja, etz wart ma erscht amal ob, ob se de Freien Wähler überhaupts traun, mit der CSU zum redn. Und nachat schau ma mal, wer nachat sonst no mitmacht, damits am Schluss für a Mehrheit g'langt. Und da Käser und da Herker wern etz natürlich auf der andern Seitn rechnen, wen du aus dem bunten Bündnis außerschmeißn konnst, damit nimmer gor so vui do mitschnobeln. I sogs eich, des is alles der Wahnsinn. Früher hots des doch ois net gem: Do warn halt de Stifte in de Wahlkabinen so kurz obundn, dass du bloß de CSU host o'kreizln kinna.