Ja, Wahnsinn! Etz homs in Wolnzach no net amal an Burgamoasta fertig g’wählt, scho ändert se de ganze politische Farbenlehre. Weil für de SPD homs de Schwarzn in de letzten sechs Johr zu bunt triebn, deshalb wui etz da Hammerschmid mit seine Roten a bunts Bündnis macha, dass de Schwarzn Rot seng – und da Quoten-Grüne glei mit. Du, do konn dir da Machold scho vor der Stichwahl leid doa. Egal, wia de ausgeht, er is immer da Depp! Wenn er etz nimma g’wählt werd, nachat is er erschtns sein Job los und konn se zwoatns als ganz normaler Gemeinderat do neihocka und zuaschaung, wia des bunte Bündnis oschafft. Und wenn er wieder g’wählt werd, nachat braucht er zwar net wieder als Anwalt arban, muaß oba dann als Burgamoasta de ganze Zeit des macha, wos eam da Hammerschmid und de bunte Koalition o’schafft. Des war mir zu bunt. Do tat i Rot seng. Oder Schwarz.