Wisst's ihr, wos fast genau so rockt wia mei Lieblingsliad "Highway To Hell"? Da Wahlkampf in Wolnzach! Du, do gehts voll ab zwecks bunte Koalition und Stichwahl zwischen Machold und Hammerschmid. Und de Nervn, de lieng anscheinend blank. Angeblich hom de CSUler etz a Machold-Banner wegdoa miaßn, weil des unerlaubt im öffentlichem Raum g'spannt war. Naja, hättns halt amal in Scheyern nochfrong miaßn, wia ma richtig spannt! Jedenfalls hot des CSU-Banner in Wolnzach anscheinend wegmiaßn, weil de Ablenkungsgefahr für de Autofahrer zu groß war. Ja, des konn natürlich scho sei. Da Intendant vom Inglstädter Stadttheater, der hot neilich selber erzählt, dass er an Bus g'streift hot, weil er so gebannt war von da OB-Kandidatin Veronika Peters ihrm G'sicht auf am Wahlplakat. Guat, i glaub etz net, dass oana vor lauter Faszination an Unfall baut, wenn er "Machold" lest oder dem sei Lätschn auf am Plakat siehgt... Auf der andern Seitn, wenn etz wirklich wos passiert tat: Dann war doch bestimmt da Hammerschmid als Helfer vor Ort sofort zur Stell.