Und, Schneckerl, host heit no a bisserl Zeit für mi? Du, apropos Kopulation: Mit dene ganzen Koalitionsverhandlungen, do moanst ja grod, mir san im Bundestag. In Wolnzach gehts bloß no um bunt oder net bunt. Da Käser tat den Straub am liabsten zum Psychologen schicka und da Straub sich den Käser aufn Mond wünschn. Oder zumindest nach Inglstodt nei. Da Schäch verzicht scho auf Stellvertreter-Posten, de eam eh koana gem wollt. Und de Freien Wähler, de machas a so, wia i mit de Weiber: Vieles für möglich halten, sich oba net festleng. In Pfahofa bastelns a scho wieda fleißig an so am bunten Bündnis, wobei des ja nimma sooo farbig werd, sondern halt ziemlich rot mit a bisserl Konfetti drin. Mei, und zwecks dem Kreistog laffa ja a scho wieder de Sondierungen. Sondiern? Des is wia Grapschn ohne Körperkontakt. Do glühn ja angeblich de Drähte vor lauter Verhandlungen. Oba woaßt, wer mir do am meisten leid tuat? De NSA, weil de muaß se den ganzen Schmarrn a no o'hörn.