De drahn etz dann bald no ganz durch in Inglstodt drin. Etz soll de Carissma-Halle, de wo ausschaut wia a verroste Blech-Kistn mit Schaufenster drin, angeblich a Leuchtturm-Projekt sei. Ja, vo wos trama nachat de nachts? Oba i hob's ja immer scho g'sagt: Du derfst Ästhetik und Inglstodt eigentlich net im selben Satz song. Schaut's eich doch bloß amal dene eanan Rothausplotz o – von dem kanntast a Buidl ins Lexikon neitoa, unter V wia verbrunzt. Und überhaupts: Wenn mia in Pfahhofa a Schloss hättn, nachat tatn mir bestimmt koa Kongresshotel davor hibetoniern. Oba dene Inglstädter is des ois wurscht – de klatschn do etz dann a so an Betonkoloss hi, dass du bloß no erahnen konnst, wo se do die Historie dahinter versteckt... Ja mei, wos soll ma song. Und nachat kummas wieder in ganze Abordnungen zu uns nach Pfahofa und wolln wissen, wia mas richtig macht. Oba do konn i ja a bloß wieder lacha. Weil unser Wasserspui, des homs uns ja zum Beispui nochg'macht. Zumindest theoretisch. Weil praktisch is es halt a so, dass unser Wasserspui sprudelt und des in Inglstodt drin dem Berliner Flughafen Konkurrenz macht im Rennen um de peinlichste Bau-Panne. Du konnst unterm Strich song: Jeds drittklassige chinesische Unternehmen is im Nochbaun und Obkupfern besser als wia de auf da Schanz.