I woaß überhaupts net, wos de si etz scho wieder alle aufreng zwecks der Nacht der Kunst. Mir als oida Rock'n'Roller war des eh immer vui zu fad. I wissat a richtig geile Veranstaltung: Pfahofa macht de erschte Anti-Dult auf der ganzn Welt – des hot wirklich no koaner. Do stellst du vor a jeds Gschäft an Verkaufsstand hi, der wo eigentlich gor net do hipasst. Zum Beispui kummt nachat vor de Parfümerie a Fischverkäufer oder a Kaas-Stand. Und vor de Apotheken werd da fette Schinken oder da Schnaps verkafft. Vorm Juwelier gibts billige Kopien aus China, vorm Friseur verkaffst Mütz. Und direkt vorm Rothaus, wo immer da Stadtrat drin tagt, do gibts Tablettn gega Vergesslichkeit – na, Stopp, mia hom ja g'sagt, es soll net zampassn.