Mei, da Käser und da Straub, de san ja wirklich wia Tom und Jerry. Da oane Feuer-Rot, da ander so Schwarz, dass er im Kohlen-Keller no an Schatten wirft. Da oane Erzieher, da ander Auto-Händler. Des war fast Stoff für a Daily-Soap. Und da Käser, der alte Ober-Sozi, der schimpft halt immer und schimpft. Und da Straub, der sitzt etz im Landtag drin, wo da Käser eigentlich neiwollt, und grinst wahrscheinlich heimlich. Do schlogt da Käser Alarm, weil angeblich  Mittelschulen in Gefahr san, und da Straub sogt: Alle Mittelschulen im Landkreis san sicher. Dann wettert da Käser wieder und moant, dem Straub fallt nix ei zwecks Schulpolitik – und da Straub sogt ganz cool: Aktuelle Nachricht aus’m Ministerium, de gebundene Ganztagsklass in Niederscheyern is etz genehmigt. Du konnst praktisch song: Immer, wenn da Käser schimpft, gibt’s vom Straub a guade Nachricht. Vielleicht sollt se da Käser etz amal g’scheit über de deitsche Fußball-Nationalmannschaft aufreng – weil dann macht uns da Straub wahrscheinlich zum Weltmoasta.