Ja, bist du deppert! Wennst bei uns in de ganzen Sitzungen gehst und dir des alles neiziagst, do moanst wirklich oft, du bist im Kino. Ja, ehrlich! Im Pfahofara Stadtrat, do denk i mir manchmal Mal, des is doch etzat a Horror-Streifen. Oder wenns wieder alle immer wieder des Gleiche song und nix weitergeht. Des is dann oft wia in „Und täglich grüßt das Murmeltier“. Und im Kreistag, do hob i mir neulich wirklich dacht, i bin in „Erkan und Stefan“ – bloß, dass da Simbeck desmal gar net do war. Oder wenn da Ober-Sozi wieder an Landrat schimpft, do glaubst du wirklich, des is des Remake von „Rot-Käserchen und da böse Wolf“. Und heit, da war a Delegation aus Thailand im Pfahofara Rathaus zu Bsuach und da Albert Gürtner hot dene auf Englisch wos erzählt vo da Stodt und vom Hipp. Do hob ich gmoant, do lafft etz grod „Lost in Translation“.