Do siehgst wieder, dass ma wirklich immer erscht amal alles in Ruhe lesen muaß, bevor ma se aufregt. Weil mir hot’s heit wirklich scho an Schalter nausg’haut. Do werd doch etzat im Pfahofara Rothaus a so a Ausstellung eröffnet, und de hoaßt: „Die großen Vier.“ Und nachat hom’s do g’schriem, dass es unter anderm um an Wolf geht. Du, ganz ehrlich: So groß is etzat der a no net, dass ma über den glei a Ausstellung macha miassat. Der baut doch manchmal an ganz scheena Schmarrn. I hob erscht neilich in da Zeitung a Interview mit eam g’lesen, do hot der sogar Fehler zuagebm, de hot eam gar koana vorg’worfa, net amal da Käser. Na, ehrlich, für sowas kriagst net amal bei der CSU a Ausstellung – und scho gor net, wenn im Rothaus drin a Roter sitzt. So vui Fehler konnst du gor net zuagebm. Oba jednfalls hob i des dann nomal g’lesn – also net des Interview, sondern des mit dera Ausstellung – und dann hob i scho g’spannt, dass es do wirklich net um den Landrat Wolf geht, sondern um richtige Viecher. Nachat war i scho wieder beruhigt.