Woaßt, wos i neilich g’lesen hob. Do gibt’s Leit, de san verliebt in Bäume. Ja, ehrlich: In dem Bericht is’ um a junge Frau ganga, de geht praktisch mit am Bam. Also, sie geht, er konn ja net. Do gibt’s sogar an Fachbegriff, wenn du scharf auf an Bam bist: Dendrophilie. Und de Frau hot erzählt, dass es zwischen ihr und dem Bam sogar zum Sex kummt. Ja, sauber! I glaub, i geh nimma in Wald naus. Am Schluss stör i de zwoa und da Bam schlagt aus...

Und etz stell dir mal vor, wenn des Mädel ihre Eltern erzählt, dass sie etzat an neuen Freund hat. Wos sogt nachat de dann? „Mein neuer Freund ist sehr verwurzelt in der Region“ oder „Er steht sehr in der Öffentlichkeit“ oder „Unsere Beziehung ist auf dem aufsteigenden Ast“ oder „Unsere Beziehung ist noch ein zartes Pflänzchen“. Also, i woaß ja net. Mit am Bam als Gspusi, do bist du meiner Meinung nach aufm Holzweg.