Mei, morgen is ja in Pfahofa wieda Dult, wega Martini. Woaßt scho, des is der, den wo de Linken etz obschaffa wolln. Naja, zu so am Krampf, da fallt mir sowieso nix mehr ei. Wahrscheinlich schaffa se de Linken demnächst no selber ob. I bin auf jeden Fall morgen wieda am Hauptplotz drin – und vorher trink i an Martini oder zwoa. Und auf der Dult, do kriagst du alles: rote Socken, schwarze Beutel und gelbe Ruam. Des is fast wia im Stadtrat. I bin eh so daschrocka, wias Anfang September g'hoaßn hot, dass dem Landkreis de gelben Säck ausganga san. I hob zerscht g'moant, dass sich die FDP aufglöst hot. Naja, song ma mal so: Ganz falsch war des etz a wieda net, wia sich dann ja bei de Wahlen rausgstellt hot.