Mei, etz bauns ja endlich wieda de ganzen Weihnachts-Hüttn am Hauptplotz auf. I g'frei mi scho so auf des Beschauliche und Romantische, auf de staade Zeit mit meine drei bestn Freind: Glühwein, Punsch und Grog. Des werd wieda a Riesn-Gaudi, do mach i praktisch durchgehend Triathlon: Jeden Tog mitm Radl nei in d'Stodt, dann werd's ziemlich feucht und dann z'Fuaß hoam. Letztes Jahr, do hob i ja beim Hoamgeh scho g'moant, i muaß etz wirklich aufhörn mit da Sauferei, weil i scho halluzinier. I hob so a grüns Manschgerl gseng mit Huat. Du, do werd's dir fei glei ganz anders, wenn des grüne Manschgerl dann a no mit dir redt. I hob glei frei raus g'sagt: Herr Polizist, wos wolln Sie von mir, i bin doch zu Fuß unterwegs. Do sogt des grüne Manschgerl zu mir: "Du bsuffana Zipfl, i bins doch, da Weihnachts-Wichtl!"