Du, host des mitkriagt? De Freien Wähler, de macha etz koan Wahlkampf, weil Advent ist. Zwecks Besinnlichkeit und dem ganzen Schmarrn. I woaß net, wos de si dabei dengan. Etz homs a so an Adventskalender im Internet drin, wo du jeden Tog an andern Schädel oschaung konnst von dene und der wünscht dir dann wos. Schnee oder Ruhe, Zeit zur Entspannung oder vui Spaß am Christkindlmarkt. Ja, moana de denn, dass i do net von selba draufkumm? Und überhaupts: Wann wolln na de dann amal ofanga mit dem Wahlkampf? Etz gehts net, weil Advent ist, dann is schlecht zwecks Weihnachten und bis Neijahr is dann eh nix los, nachat kummt Heilig Drei Kini und dann geht ja scho da Fasching los. Und wenn der vorbei is, dann is Wahl. Du, de wern se oschaun. Des is wia damals bei mir: I hob amal a Oide g'habt, de hob einfach net weidabrocht, weil imma irgendwos war: Zerscht hot's Geburtstag g'habt, do konnst dann a net kurz vorher Schluss macha. Dann is a Urlaub bucht, a anders mal host du koa Zeit oder sie hot a Gripp, oder sie hot dann an Stress in da Arbat oder wos woaß i, und bist du schaust, is wieda a Jahr rum und nix is weida ganga. Woaßt scho, wos i moan... Du etz amal wos ganz wos anders: Wia kummst etz du so als Alleinerziehender klar?