I sog eich bloß oans: Des is fei a net so einfach, wennst jedn Dod bläd daherredn sollst und nix dafür kriagst. Wenn do etz net bald amal wenigstens a Mindestlohn oder a Weihnachtsgeld rüberschaut, nachat streik i. Dann kinnas selba schaun, wos bleim, de vo pfaffahofa-today. Heit hob i eana drei Vorschläge g'schickt und koana war dene Deppn lustig gnua. Zerscht hob i g'sagt, i bin scho ganz froh, dass des Rothaus no a poar Tog o'gstrahlt werd, zwecks der Erhellung vo dene do drin. Wei schaugts eich doch o, wos im Landratsamt los is, wo koana neistrahlt. Homs g'sagt: Is net lustig. Nachat hob i g'sagt, okay, mach ma an andern Witz: Mei, bin i froh, dass i heit net nach Minga g'fahrn bin, da war i eh bloß im Stau g'standn. Da fahr i liaba nach Ilmmünsta nüba in Kirch; do konns da höchstens passiern, dass de da Pfarra siehgt und nausschmeißt oder dir an bösn Briaf schickt, zwecks Fegefeuer und so. Nachat homs g'sagt vo pfahofa-today, des passat etz net so richtig zur Weinachtszeit. Dann hob i no an Gag g'macht: Wos is da Unterschied zwischn dem FC Inglstodt bei de Heimspiele und am Marienkäfer? Da Marienkäfer hot mehr Punkte! Do homs dann g'sagt: Do fehlt da Bezug zu Pfahofa. Dann hob i g'sagt: Leckt's mi doch am Oasch und schreibt's eiern Schmarrn künftig selba, nachat werd's scho schaun, wo's bleibts. Na kinnans oba des Ganze glei umtaufa in Gscheithaferl oder wos woaß i. Etz werma mal schaun, wer do am längern Hebel sitzt. Wei dene falls doch eh selba nix ei.