I glaub, i spinn! Do bist oamal im Jahr für a langs Wochenend beim Schifoan und scho drahns alle durch. Schlägerei unter Eishockey-Fans am Pfahofara Hauptplotz! Ja, wo samma denn? Sans etz ganz bled, oder wos? Und nachat im Stadion no weider randaliern, des homma gern. Ja, wissn denn de Deppn net, dass des Stadion sowieso scho so marod is. Und nachat hantierns no mit bengalische Feier rum, de Teilzeit-Tifosi. Mei o mei. Na, bitte, seid's ma net bös, oba für solche Trottln, do gibts wirklich nur oan richtign Plotz: De g'hern doch alle ins Dschungel-Camp.