I sog's eich, des war a Schau heit im Stockerhof. An Haufa Tänzerinnen und da Michael Jackson war a do. Und da Habl, da Simbeck und da Stahl. War trotzdem lustig. Des war ja scho mehr Prominenz wia beim Stadtball. I war ja selba a net bei dem Ball, desweng warns ja wahrscheins so weng VIPs. Oba bittsche, i konn wirklich net jedn Omd irgendwo sei. Mei Oide draht eh scho durch. I hob g'hert, dass nur sieben Stadträte bei dem Ball warn. Der Rest is vermutlich scho aufm Weg ins Dschungelcamp, de bei RTL brauchan doch immer C-, S- oder U-Promis. Oba des heit Nachmittog mit de Tänzerinnen, des war a Sach. Wahrscheinlich hom se da Habl und da Stahl scho mal an den heißen Tanz g'wöhnt, der im Wahlkampf no kimmt. An Röder hob i etz heit net g'seng, oba der war angeblich wiederum beim Stadtball und hot se do song lassn miaßn, dass er's mit de Rückspiegel hot. Mei, du, des is vielleicht g'schert. Do löst da Inspektor Röder den größten Kriminalfall in der Geschichte von Rohrbach und nachat werd er a no ausg'richt, bloß weil Fasching is. Des san wirklich kulturelle Mutationen. Für mi is da Röder da Columbo vo Pfahofa, des mecht i bloß a mal g'sagt hom. Und wenn am 16. März da Herker wieder g'winnt, nachat konn er bestimmt vui besser ermitteln, warum er verlorn hot, wia da Gürnter oder der Dings vo da FDP. No, wia hoaßt der denn vo da FDP, glei wieder: Kalkutta oder so ähnlich.