Mei, schee… Etz kummt endlich da Frühling. I g'frei mi scho, nachat konn i wieder im Freien saufa! An Fasching homma guat rumbrocht, bis aufn Habl san etz wieda alle normal ozong. Und de Wahl, de bring ma etz a no rum, dann homma wieder für sechs Johr unser Ruah. Und zwar nachhaltig und lebenswert. Oba bis zum nächsten Sonntog werd's scho no a bisserl hektisch zwecks Wahlkampf und alles. Weil etz natürlich da oane oder ander koide Fiaß kriagt und Angst hot, dass er vielleicht doch nimma neig'wählt werd in Stadtrat. I konn bloß song: Wos du sechs Johr net grissn host, des reißt du a Woch vor der Wahl a nimma. Des is ja, wia wenn de Fußballer vo Braunschweig etz no schnell neie Trikots oder an neien Stadionsprecher kriang tatn, weils moana, nachat kummas no in Uefa-Cup nei. Da oanzige, bei dem wo a neie Trikotfarb vielleicht huift, des is eventuell da Inderwies. Oba do bin i mir a no net so sicher. Apropos. I hob g'hert, dass de FDP angeblich a Dienstaufsichtsbeschwerde macht gega de Stodt Pfahofa, weil de eana vor 650 Jahr de Vereinsfarbn vorweg gnomma hot.