Du Schneckerl, host des mitkriagt. Da Woedl, der lasst se nix g'falln. Woaßt scho, der wo früher da Chef vo da Klinik war, der hot etz praktisch in seiner letzten Operation dem Postel an Maulkorb verpasst. Also, net er, sondern as Landgricht vo Inglstodt. Du, dem seine Anwälte, de kumma zwar aus Bochum, oba de kenna se trotzdem aus. De hom de FDP ganz schee am Sack. Am gelben Sack, konnst praktisch song. Obwohl da Postel & Co. ja de gelbe Tonne wolln. Du, und mit dera einstweiligen Verfügung gega de FDP is des fei no net erledigt, host des g'lesn? Da Woedl wui vielleicht sogar Schadenersatz und Schmerzensgeld eiklong vo dene. Du, etz ganz ehrlich: Des konn ich scho aus Prinzip versteh. Weil des tuat zum Teil scho weh, wos de FDP do obziagt.