Mei, de ganze Welt kannt so schee sei, wenns net sovui Deppn gebn tat. Übrigens, do san wirklich in Freising a paar Spezialistn in a Sportheim ei'brocha, weils Leergut stehln wolltn. Mei Vater tat song: Wenn da Mensch spinnt, nachat gibt er a Zeichen! Also i konn ma des bloß so erklärn, dass des lauter Flaschn warn – und de hot's halt sozusagen zu ihresgleichen hizong. Oder des warn Logiker: De hom se denkt, du brauchst immer leere Flaschen im Haus, wenn amal oana auf B'suach kummt, der wo koan Durscht hot.

Apropos Logiker: Am Dienstog is in Pfahofa endlich mal wieder a Stadtrat-Sitzung. Zeit werd's, dass der neie Stadtrat amal wos tuat, mir is scho ganz fad. Und de erschte Sitzung, de kanntat spannend wern. Weil de SPD wui natürlich, dass da Feßl Peter wieder Musikreferent werd – und de CSU sogt freilich: Da Penger Max, der kennt se doch vui besser aus. Do is Musik drin, des sog i eich. Des mog natürlich scho sei, dass da Penger fachlich der geeignetere Mann is, oba de andern hom halt de Mehrheit. Im Grund gibts ja bloß oa Lösung: Du muaßt zwo Referentenposten macha. Nachat soll se da Penger um Kirchenmusi und Volksmusi kümmern und da Feßl is dann zuständig für Hardrock, Heavy Metal und Punk. Oba dann brauchst natürlich no oan für Reggae – und do fallt mir etz wirklich bloß da Schmuttermayr ei.