Des is natürlich saublöd g’laffa! Do fahrt da CSU-Stadtrat Röder zwecks dene greislign Blumakübl extra mitm Auto vo Niederscheyern in Richtung Mitterscheyern nüber, weil er sich natürlich als eifriger Stadtrat de optische Zumutung persönlich und vor Ort oschaung mechat, und nachat werd ausgerechnet er, da Polizist, blitzt. Hot er heit sogar selber im Bauausschuss zuagem.  Immerhin, des muaß ma ja scho song, zoagt des doch, dass de Pfahofara Polizei durchgreift. Vielleicht konn da Röder des ja als Werbungskosten vo da Steuer absetzn. Obwohl, des bringt ja a nix, weil für Wahlwerbung is des natürlich ziemlich spät...