Also Leit, etz amal ehrlich: Des is scho ganz schee peinlich, wennst du dir ausgerechnet als Landratsamt selber an Giebel genehmigst, der wo vui z’hoch is, und des G’richt stellt dir nachat den Bau ei. Und du sogst dann einfach, du host den G’richtsbeschluss oba anders g’lesn, und baust einfach weida. Und wenn nachat a recht zintige Richterin vorbeikummt und sogt, sowas hot sie überhaupts no et erlebt, dann duast du recht unschuldig und sogst: Mei, de is halt mit’m falschen Fuaß aufg’standn. I mechat a mal seng, wos as Landratsamt mit mir macha tat, wenn i mi net an so an Baustopp halt und einfach weiterbau – oder mir am Besten glei direkt an Schwarzbau histell und dann halt einfach so: Mei, den Briaf vom Landratsamt, den hob i scho kriagt, oba i hob den halt anders interpretiert. Und da Landrat, der Chef von dem ganzen Verein, der sogt natürlich etz trotz der ganzen Giebel-Aufregung: Er stellt sich vor sei Verwaltung. Ja, des is mir scho klar: Vor de Verwaltung stellt er sich. Des is praktisch am Hauptplotz, schee in da Sonn. Weil hinter der Verwaltung, am Hofberg, do is ja der Schattn. Zwecks dem Giebel.