Ja, wo is’n do des Hirn? I glaub, i spinn! Bloß, weil de im Pfahofara Rathaus drin net rechtzeitig g’spannt hom, wann de eigene Gartenschau is, muaß husch, husch a Zwischenlösung für den Wertstoffhof her. Und des kost etzat mal schnell dem Abfallwirtschaftsbetrieb vom Landkreis um de 50 000 Euro, weil der Plotz vom Hechinger an der B 13 betoniert wern muaß.  So vui, wia de für a Provisorium für angeblich ungefähr oa Jahr ausgebm, so vui verdiena de meisten net amal. Und überhaupts: Warum homs na do mi net g’fragt? De hättn mein Hof sofort kriagt. Nachat hätt i a ordentliche Pacht kassiert und am End hätt i sogar endlich statt dem verbrunztn Schotter an gscheiden Plotz h’habt. Oba des is ja des Problem mit dene Freizeit-Politiker: Selber lassen’s koa Freimaß aus, oba wenn’s ums Geld von der Allgemeinheit geht, nachat spuin 50 000 Euro koa Rolln. Und da Herker, der war net amal in der Sitzung von dem Ausschuss, der Feigling. Weil dann hättns eam wahrscheinlich g’fragt, wann er denn mitkriagt hot, dass in seiner Stodt demnächst a Landesgartenschau is.

(Artikel zum Thema: Teures Provisorium)