Etz hommas ja gottseidank eh bald g'schafft mit der ganzen Vorweihnachtsgaudi. I bin scho a bissl froh, ehrlich g'sagt. Weil erschtns draht mei Oide etz bald durch, wenn i jedn Omd bsuffa hoamkumm, und zwoatns packt des mei Leber nimma. Wobei des mit dem Wichtel scho a guade Idee is, a wenn da Kulturelle-Mutations-Gegner Röder nix davo halt. Oba des liegt vielleicht einfach do dro, dass dem halt koana a Sackerl vor sei Tür leng lasst. Mir is jedenfalls heit a Buach g'wichtelt worn, i woaß bloß leider net von wem. "Das Buch der Abkürzungen" hoaßts. Du, des is fei wirklich ganz interessant. Host du zum Beispui g'wusst, woher de Markn "Alete" kummt? Steht do drin: Weil "alete" lateinisch is und hoaßt: "Ernährt Euch!" Oder woaßt du, woher Hanuta kummt? Du, des bedeit nix anders wia HAselNUssTAfel. Verstehst? Oba woaßt, wos da falsch drinsteht in dem Biachl? VIP. Weil des hoaßt ja neierdings "Vernunft in Pfahofa". Zumindest, wenns nach der hiesigen FDP geht. Woaßt scho, des is doch de Interessengemeinschaft, de wo früher mal a Partei war. Und wos hoaßt nachat FDP? Wahrscheinlich: Frag doch Postel.