Sowas host etz a net jedn Tog! Da Wolfgang Inderwies, der oide CSUler, kandidiert af da SPD-Listn fürn Pfahofara Stadtrat. Do haut's da doch an Vogel naus. Und angeblich hot er des de Schwarzn erscht a poar Stund vorher g'sagt. Do werns wieda beißn, de ganzn Röders und Schranzens und wias no grod alle hoaßn. Oba da Inderwies sogt natürlich, Politik is wia Profi-Sport: Do wechselt ma halt amal des Team. Naja, song ma mal so: Net alles, wos hinkt, is a Vergleich. Und außerdem, du konnst a net einfach so vo de Sechzger zu Bayern wechseln oder andersrum. Der Inderwies konn bloß froh sei, dass mir nimma im Mittelalter lebn, wei do hättn de Folterknechte von der CSU se den Verräter scho zur Brust g'nomma. Do hätt der alles zruckgnomma. Oba so ändern se halt de Zeitn: Heitzetog geht ma zur SPD und foltert se praktisch selba.