Des san da vielleicht so Schwalben-Könige! Host des g'hert? Etz hot da Stadtrat vo Pfahofa zwar beschlossn, dass bei der Fuaßboi-WM a Public Viewing vor der Kirch g’macht werd – oba de Spezialistn hom g’sagt, dass bloß de Spiele vo unsere Deitschn zoagt wern solln. Und wenn mir außefliang, nachat gibt’s a koa Public Viewing mehr. Ja, wer überlegt se na bitte so an Krampf?! Du, dene tat i scho helfa mit eanam Live-Stream vo de Stadtrats-Sitzungen. Ab sofort miassat dann konsequenterweis geltn: Sobald oana an Schmarrn verzapft, is de Übertragung beendet. Do sparst du dir an Haufa Geld. Weil dann braucht da Breitner Andi im Grund gor net erscht aufbaun.