Gedanken, die sich wahrscheinlich sonst keiner macht.
I glaub echt, der bunten Koalition in Pfahofa geht etz langsam d' Farb aus. Wennst scho moanst, dass du richtig bist, ja dann kehrst du doch net einfach mittendrin um und haust an Rückwärts-Gang nei. Zerscht wollns unbedingt de Durchfahrt zwischen am Obern und am Untern Hauptplotz sperrn, dass do koana mehr durchfahrn konn – weil des is total wichtig fürs ganze Verkehrs-Konzept, hams g'sagt. Und etzat, wo de CSU a paar Unterschriften g'sammelt hot, kriangs auf oamal kalte Fiaß und ruadern zruck.
Ja, sog amal: Wia überzeugt san denn da Herker und seine Leit von ihrer eigenen Idee, wenn's Muffensausen vor am Bürgerentscheid hom? Angst vor da Meinung vo de Bürger, oder wos? Du, ganz ehrlich: Wenn i so felsenfest moan, dass i richtig lieg, dann ziag i des doch durch, und zwar ganz cool. Aber wahrscheinlich hams net amal selber so recht an ihr Konzept glaubt. Obwohl da Haiplik doch immer sogt, er hot Angst beim Radl-Fahrn wega dem ganzen Auto-Verkehr.
Und dann der Dörfler Roland heit wieder in der Stadtrat-Sitzung. Eigentlich is er ja – zumindest auf'm Papier – a Grüner. Aber praktisch is er anscheinend in erster Linie Dritter Bürgermeister, und natürlich Finanz-Referent vom Stadtrat. Er sogt ja immer, wenns um Ausgaben geht, in seinem Herzen schlagen zwei Brüste – oder anders rum.
Auf jeden Fall: Des konnst halt echt net glaum, dass ausgerechnet a Grüner öffentlich sogt, dass er gegen an kostenlosen Stadtbus in Pfahofa is. Wo doch de Stodt in dem Jahr 46 Millionen Gewerbesteuer kassiert und immer auf Nachhaltigkeit und Umweltschutz macht. Aber da Dörfler moant, a kostenloser Stadtbus geht trotzdem net, weil ma braucht de Einnahmen vo de Fahrkarten.
Also, i hob an Freind vom Ausland, der stammt aus Bielefeld: Und der sogt immer, weil er is ja a Preiß: "Ich sehe bald schwarz für diese bunte Koalition in Eurem Pfaffenhofen an dieser Ilm." Etz konnst du natürlich song: Wos wui der Preiß und Bielefeld gibt's eh net? Auf der andern Seitn: Der Moser vo da Pfahofara CSU, der werd etzat erscht amal feiern, dass da Herker & Co. im Stadtrat verlorn hom – trotz bunter Mehrheit. Und mei Oma, gottselig, de hot seinerzeit scho immer g'sagt: Wennst du glaubst, dass a Kloaner gegen an Großen nix ausrichten konn, dann wünsch i dir bloß oans: A Mückn nachts in deim Schlafzimmer.
Artikel zum Thema:
Sperrung der Hauptplatz-Durchfahrt ist erst einmal kein Thema mehr
Kein Bürgerentscheid zum Hauptplatz
Gewerbesteuer-Hammer: Pfaffenhofen kassiert heuer wohl 46 Millionen Euro
